Posted in Տիեզերք

Տիեզերք նախագիծ

Նպատակը՝  Պատկերացում տալ Արեգակնային համակարգի և Երկիր մոլորակի մասին: Երկիր մոլորակի պահպանումն ու խնամքը մարդու կողմից

Խնդիրները

  • Զարգացնել տեսանյութեր դիտելու, տեղեկույթ կարդալու, դրանց բովանդակությունը ներկայացնելու կարողությունները
  • Զարգացնել տեղեկույթը կարդալիս գլխավոր միտքը երկրորդականից տարբերակելու կարողությունները
  • Ձևավորել և զարգացնել ունեցած տեղեկույթը ներկայացնելու կարողությունները P. Point ծրագրով
  • Զարգացնել P. Point ծրագրով աշխատելու կարողությունները
  • Զարգացնել խմբում աշխատելու կարողությունները
  • Ձևավորել և զարգացնել դիտարկումներ, դիտումներ, ուսումնասիրություններ կատարելու կարողություններ
  • Ձևավորել և զարգացնել աշխատանքը պլանավորելու, նախագծելու և քայլ առ քայլ իրականացնելու կարողություններ
  • Զարգացնել քարտեզից օգտվելու կարողություններ
  • Ծանոթացնել ավանդապատում ժանրին
  • Զարգացնել ստեղծագործական երևակայությունը
Continue reading “Տիեզերք նախագիծ”
Posted in Հոդված, Ուսումնական ագարակ

ՈՒսումնական ագարակ

Ագարակը՝ «Իմացումի հրճվանք» ծրագրի ուսումնական նախագիծ

Բնության և ուսուցման կապի շնորհիվ շատ ավելի իրական, տեսանելի, ուրիշ է դառնում կրթական գործընթացը: Երեխաները պետք է կապված լինեն բնության հետ: Գիտությունը ապացուցել է, որ այն շատ լավ դեղամիջոց է ստրեսի դեմ։ Բնության գրկում ժամանակ անցկացնելը կարող է օգնել ուշադրության պակասի խանգարում ունեցող երեխաներին, գնահատել ներկա պահը և մտածել ավելի թարմ ուղեղով, զարգացնել ստեղծարար միտքը: Էդպիսի մի բնության գիրկ է մեր «Ագարակը» իր կենդանիներով: Կենդանիների օգտակար ազդեցությունը երեխաների նկատմամբ՝ հայտնի են: Հոգեթերապևտիկ բուժման արդյունավետ մեթոդներից մեկը կենդանիների հետ շփումն է, որը նախատեսված է մտավոր հետամնացություն, նեվրոզ, աուտիզմ և հիպերակտիվություն ունեցող երեխաների համար: Այն հարցին, թե արդյոք անհրաժեշտ է հնարավորություն տալ երեխային շփվել կենդանիների հետ, հոգեբանները միանշանակ պատասխանում են՝ այո: Կենդանիների հետ շփումը, խթանում է երեխայի մտավոր զարգացմանը: Այն համարվում է բնության մասին գիտելիքների սկզբնաղբյուրը: Երեխան պետք է հնարավորություն ստանա շատ շփվել կենդանու հետ, ուսումնասիրի նրանց բնութագրերը, առանձնահատկությունները, վարքագծին հետևի: Երեխաները կենդանիների հետ շփվելիս դաստիարակվում են նաև բարոյապես: Կենդանիների հետ շփվելու ընթացքում երեխան սովորում է կենդանիների խնամքի պարզ հմտություններ, պարզ աշխատանքային գործեր: Կենդանիների հոգածության գործընթացում երեխան կոփվում է ֆիզիկապես,ամրացնում է առողջությունը:

Կենդանիների հետ շփումը իր ուրույն հետքն է թողնում երեխայի աշխարհճանաչմանը: Երեխան սկսում է բնությունը բացահայտել, վախերից ձերբազատվել, սովորել խնամել և հոգ տանել։ Շատ կարևոր է կենդանիներին ուսումնական հարթակում ներառել, որպեսզի երեխաները կարողանան տարբերել, թե որ կենդանու հետ ինչպես վարվել, ինչպես կերակրել, ինչպես խնամել: Ինչքան կարևոր է կենդանիների հանդեպ հոգատարությունը, խնամքը, ինչպես պետք է սիրել կենդանիներին՝ առանց վնասելու, առանց բնությունն աղտոտելու:

Սեպտեմբերից ուսումնական ագարակը՝ որպես ուսումնական միջավայր, ներառեցինք մեր ուսումնական գործունեության մեջ՝ կապելով «Ես և շրջակա աշխարհը», «մայրենի», «մաթեմատիկա» առարկաների հետ։

Սեպտեմբերից սկսեցի իրականացնել ուսումնական ագարակ նախագիծը, շաբաթը մեկ օր՝ հստակ պլանավորած ժամով, Էդմոն Փաշինյանի հետ: Սովորողներն արդեն գիտեն իրենց ագարակի օրն ու ժամը՝ իրական իմացումի հրճվանք է: Սկզբի այցերը միայն ուսումնասիրում էինք, ծանոթանում ինչպիսի կենդանիներ կան ագարակում: Հետո սկսեցինք հերթափոխ խմբերով խնամել ձիերին, պոնիներին, իշուկին, հաղթահարելով մեր վախերը:

Ագարակը նաև շատ լավ, տրամադրող հարթակ է, ընթերցելու ստեղծագործելու համար: Ղազարոս Աղայանի «Արևի ճառագայթները» կարդացինք, քննարկեցինք և սկսեցին պատմվածքի շարունակություն հորինել ռոդարյական հնարքներով:

Ուսումնական ագարակի ամեն մի այցը մի նպատակ է հետապնդում: Այցերից մեկի ընթացքում ներկա գտնվեցինք սմբակների մաքրման գործընթացին: Շատ հետաքրքրված նայում և խնամում էին սովորողները՝ ձիու գովքը երգելով:

Համացանցի կապը ագարակի հետ՝ սկսեցինք որոնողական աշխատանքներ կատարել կենդանիների վերաբերյալ: Հանձնարարություը էսպիսինն էր՝ ագարակում բնակվող յուրաքանչյուր կենդանու վերաբերյալ տասը փաստ ներկայացրո՛ւ: Հսկայական տեղեկատվական աղբյուրներից սովորողը պետք է կարդա և իրեն հասկանալի և մտապահած նախադասությունները պատմելով գրի առնի: Այսպիսով ունեցանք կենդանիների մասին պատմող փաստեր, որը հրապարակեցի դասարանական բլոգում և սկսեցինք ընթերցել և սովորել:

Ագարակի մյուս բնակիչների տարածքում սկսեցինք հաշվել քանի բադ, հավ, աքաղաղ, սագ է բնակվում և բազմապատկման աղյուսակը կիրառելով խնդիրներ հորինեցինք: Խնդիրները սկսեցինք ավելի բարդացնել և գրի առնել:

Ուսումնական ագարակի կարևորագույն ուսուցումն եմ համարում էկո ուսուցումը՝ սննդի մնացորդների կազմակերպումը դեպի ագարակ: Ողջ օրվա՝ նախաճաշի, ճաշի, բանջարեղենների մնացորդները հավաքվում է և տարվում ագարակ: Այնտեղ բաշխվում և տեսակավորվում է, թե որ կենդանուն ինչ սնունդ պետք է տրվի: Սովորողները՝ խմբերով սիրով մասնակցում են այդ գործընթացին: Նախ սկսում ենք կշռել մնացորդը և սովորել իրական կշեռքի հետ աշխատելը:

Երբ արդեն ագարակում ենք, մեծ սիրով ու ոգևորությամբ կերակրում ենք կենդանիներին:

Ուսումնական ագարակ նախագիծը շուրջտարյա է և մեզ չէր խանգարում ցուրտը: Ձմռան օրերին նույնպես իրականացրել ենք խնամք: Սովորել ենք, թե վարելու ընթացքում ինչ է մեզ անհրաժեշտ: Իսկ վերջում վայելել ենք մեր սիրելի Մաշային՝ իր եռաչափ շարժումը զգալով, որը երեխաների ցարգացող մկանների համար ամնակարևորն է:

Ձիերը կոչվում են «կենդանի տրենաժոր»։ Բուժումը կոչվում է հիպոթերապիա՝ քայլելիս ձիու մեջքը կատարում է եռաչափ տատանումներ, որոնք կրկնում են նաև ձիու վրա նստած երեխայի մարմնի բոլոր մկանները։ Այդ տատանումների միջոցով տեղի է ունենում ձգված մկանների թուլացում և թույլ մկանների միաժամանակյա մարզում, ինչը հատկապես կարևոր է մանկական ուղեղային կաթված /ՄՈւԿ/ ունեցող երեխաների համար։

Ոսումնական ագարակ նախագիծը իրականացնելու արդյունքում սվորողները կարողանում են հաղթահարել իրենց վախերը ընտանի կենդանիների հանդեպ, կարողանում են արժևորել ու գնահատել շրջապատող աշխարհը, տարբեր հմտություններ են ձեռք բերում խնամքի վերաբերյալ, սովորում են, թե որ կենդանին ինչ է ուտում և ինչպես կերակրել: Կենդանիների մասին կարևոր տեղեկություններ են իմանում: Ագարակը երեխաներին դրական հույզեր է տալիս, սովորեցնում է սիրել:

Posted in Տիեզերք

Հայ հին վիպաշխարհ

  1. ԱՐԵՎՆ ՈՒ ԼՈՒՍԻՆԸ

Լինում են, չեն լինում, մի քույր ու մի եղբայր են լինում. քրոջ անունը Արև էր, եղբոր անունը՝ Լուսին:

Արևը ոսկեգույն մազերով ուրախ և աշխույժ աղջիկ էր: Երբ լույսը բացվում էր, նա արթնանում էր ու ջերմացնում աշխարհը: Ծաղիկները նազանքով բացվում ու ժպտում էին Արևին: Մարդիկ, նրանից ուժ ստացած, շտապում էին աշխատանքի:

Երբ Լուսինը տեսավ, որ բոլորը ջերմորեն սիրում են իր քույր Արևին, որոշեց ինքն էլ բարի գործ անել քույրիկ Արևի պես: Եվ շտապեց Արևի մոտ:

  • Քույրի՛կ ջան,- ասաց նա,- ես մինչև հիմա ոչ մի լավ գործ չեմ արել: Ես էլ եմ ուզում բարի դառնալ: Դու գիշերը քնի՛ր ու հանգստացի՛ր, իսկ ես կշարունակեմ լուսավորել երկիրը. չէ՞ որ տղա եմ և գիշերը դուրս գալուց չեմ վախենա:

Քույրը լսեց եղբորը և ուրախությունից արտասվեց. երկինքը ներկվեց ծիածանի յոթ գույներով:

Լուսինը կատարեց իր խոստումը, և մինչև օրս էլ Արևը դուրս է գալիս ցերեկը, իսկ Լուսիկը՝ գիշերը:

  1. ԱՐԵՎ ՈՒ ԼՈՒՍԻՆ

Արևն ու լուսինը աստծո զավակներն են. արևը աղջիկ է, լուսինը՝ տղա։ Հոր հրամանով նրանք պարտավորվում են գիշեր-ցերեկ հերթով հսկել աշխարհին։ Քույր ու եղբայր վիճակ են գցում, թե իրենցից ով գիշերը հսկի։ Վիճակն ընկնում է քրոջը՝ արևին։ Քույր ու եղբայր սկսում են տաքտաք վիճել։ Աղմուկի վրա գալիս է հայրը։ Երբ իմանում է պատճառը, նախատում է լուսնին և հրամայում, որ նա գիշերները հսկի։ Լուսինը հանձն է առնում կատարել հոր կամքը։ Ապա աստված դիմում է աղջկան՝ արևին, առաջարկելով ցերեկները հսկել։ Արևն առարկում է, ասելով՝ որ ինքն իր աղջիկ տեղով ամաչում է օրը ցերեկով մարդկանց աչքին երևալ։

— Այդ դեպքում, — ասում է հայրը, — ձեռներիդ մեջ մեկ–մեկ խուրձ ասեղ բռնիր. ով որ կհամարձակվի քեզ նայել, ասեղներով ծակիր աչքերը։

Արևն ընդունում է այդ առաջարկությունը և այդ օրից սկսած հոր կամքը կատարում։

  1. ԱՐԵՎ ՈՒ ԼՈՒՍԻՆ

Արևի և լուսնի մայրը ապրում է երկնքում՝ աստղատանը։ Մի անգամ գիշերը, երբ մայրը խմոր է շաղախում, արևն ու լուսինը կռվում են։ Արև քույրն ասում է.

— Ես գիշերով դուրս չեմ ելնի։ Լուսին եղրայրն էլ ասում է.

— Ես ցերեկը դուրս կգամ։

Շատ որ կռվում են, մայրը վեր է կենում տեղից, խմորոտ ձեռքով ուժեղ ապտակ է հասցնում լուսնի երեսին, գիշերով նրան տանից հանում, գցում դուրս։ Այդ օրվանից մինչև հիմա լուսինը գիշերն է դուրս գալիս, արևը՝ ցերեկը։

  1. ԱՐԵՎ ՈՒ ԼՈՒՍԻՆ

Մի անգամ մայրը արևին ու լուսնին ասում է.

— Գնացեք աղբյուրից ջուր բերեք, ծարավ եմ, ով շուտ բերի, նրան կօրհնեմ։

Քույր ու եղբայր վեր են կենում, գնում ջրի։ Լուսինը քրոջից առաջ է անցնում և կուժը դնում աղբյուրի խողովակի տակ, որ ջուր լցվի։ Արևը եղբորից թաքուն ծակում է նրա կժի տակը։ Վերադարձին լուսնի կժից ջուրը հոսում, թափվում է, կուժը մնում է դատարկ։ Իսկ արևը կուժը լիք լցնում է ջրով, բերում, տալիս է մորը, ստանում նրա օրհնությունը։

  1. ԱՐԵՎ ՈՒ ԼՈՒՍԻՆ

Մի անգամ արևն ու լուսինը գնում են գետը, լողանում։ Լուսին եղբայրը մի քիչ լողալուց հետո շուտ դուրս է գալիս ջրից, սպասում, որ երբ քույրը ելնի ջրից, տեսնի նրա մերկությունը։ Արևը կռահելով եղբոր դիտավորությունը, ամոթից երկինք է բարձրանում։ Լուսինն էլ անմիջապես նրա հետևից բարձրանում է երկինք, հետապնդում քրոջը, բայց մինչև օրս էլ հետապնդում է նրան և չի կարողանում հասնել։ Դրա համար էլ արևը իր սուր ասեղներով ծակծկում է թե լուսնի և թե բոլոր նրանց աչքերը, ովքեր փորձում են նայել իրեն։

  1. ԱՐԵՎ ՈՒ ԼՈՒՍԻՆ

Արևը թագավոր է, լուսինը՝ թագուհի։ Լուսինը շրջագայության է դուրս գալիս այն ժամանակ, երբ արար աշխարհը քնած է լինում, որպեսզի ոչ ոք չկարողանա իրեն տեսնել։ Նա զբոսանքի է դուրս գալիս՝ շրջապատված աստղերով, որոնք իր ընկերուհիներն ու նաժիշտներն են։ Լուսին թագուհին ծով բարիքներ է սփռում աշխարհի բոլոր արարածներին, մեկ-մեկ էլ ամոթխածությունից իր դեմքը ծածկում է ամպի քողով։

  1. ԼՈՒՍԻՆ

Լուսինը մի անհամբեր երեխա է եղել։ Մի օր, երբ մայրը խմոր է շաղախում, լալով գալիս է, մորից հաց է ուզում։ Մայրը զայրացած՝ խմորոտ ձեռով ապտակում է լուսնին, անիծում, որ նա երբեք չկշտանա։ Ապտակից լուսինը թռչում է երկինք, դեմքին՝ խմորի կտորներ։ Երբ լուսինը կուշտ է լինում, պայծառ փայլում է երկնքում, երբ քաղցում է՝ խավարում։՛

  1. ԱՍՏՂԵՐ

Աստղերը երկնքի կանթեղներն են, որոնք իբրև ջահեր առանց պարանի կախված են բարձր ու լայն, անսյուն ու անգերան կառուցված երկնային տաճարում և առանց ձեթի լույս են տալիս։ Աստղերը լինում են չար և բարի։ Ամեն մարդ ծնվում, աշխարհ է գալիս մի աստղի տակ. որի տակ կանգնում է մարդը ծնվելիս՝ իր բախտն է։ Եթե նրա աստղը բարի է, նա բախտավոր է, եթե չար է՝ դժբախտ։

9.    ԿՐԱԿ ՈՒ ԿԱՅԾԱԿ

Ժամանակին քարերն ու ծառերը մարդկանց նման շարժվել են, խոսել, կերել, խմել։ Սատանան տեսնելով այդ, գալիս է աստծո մոտ, իրավունք խնդրում, որ ինքն էլ մի բան ստեղծի։ Աստված քմծիծաղ տալով ասում է.

— Թե կարող ես՝ ստեղծիր։

Սատանան գնում է քարերի մոտ, տեսնում, որ նրանք ոսկուն են թագավոր դարձրել, ասում է.

— Կայծքարն ավելի զորավոր է և կարող է ոսկուց լավ թագավոր լինել։

Ասածը հաստատելու համար նա մի տան մեջ խոտ, փայտ ու ցան է լցնում, ապա առաջարկում է կայծքարին՝ երկաթին բախվել։ Կայծքարն ու երկաթը բախվում են իրար, կայծեր առաջացնում։ Կայծերն ընկնում են տան մեջ լցրած չոր խոտի վրա, վառվում, կրակ ստեղծում։ Մարդիկ ու քարերը հավաքվում են կրակի շուրջը և նրա միջից հանում խորոված պտուղներ ու կենդանիներ, ուտում։ Շատ են հավանում դրանց համը, սկսում են այդ կրակից տանել իրենց տները, օջախ սարքել, վրան կերակուր եփել։

Աստված զայրանում է սատանայի վրա, որ նա կրակի գաղտնիքը հայտնել է մարդկանց, ասում է.

— Սպասիր, քո պատճառով այնպիսի կրակ ստեղծեմ, որից սարսափեն մարդիկ։
Եվ նա ստեղծում է աստծո կրակը՝ կայծակը, ուղարկում է երկիր։ Կայծակի հենց առաջին հարվածից զոհվում են տասը մարդ։ Սատանան սարսափահար փախչում է և այլևս աստծո աչքին չի երևում։ Աստված պատժում է քարերին, զրկում նրանց շարժվելու և ուտելու ունակությունից, որովհետև մարդիկ կայծքարի միջոցով էին իմացել կրակի գաղտնիքը։

Աստված նույն կերպ պատժում է նաև ծառերին, որոնք իրենց կամքով վառելիք էին դարձել մարդկանց համար։

10. ՀՈՒՐ ԵՎ ՋՈՒՐ

Կրակն ու ջուրը քույր ու եղբայր են. կրակը քույրն է, ջուրը՝ եղբայրը։ Մի անգամ քույր ու եղբայր վիճում են, թե իրենցից ով է ավելի ուժեղ։ Որոշում են չափել իրենց ուժերը։ Կրակը իր ուժը ցույց տալու համար սկսում է այրել սարերի ամբողջ չոր խոտը։ Եղբայր-ջուրը գալիս է և անմիջապես հանգցնում հրդեհը։ Այդ օրվանից քույր ու եղբայր բաժանվում են իրարից։

Մի անգամ եղբայր-ջուրը իջնում է սարից, քույր կրակն ասում է նրան.

— Արի մի քիչ նստիր, տաքացիր։

Զուրը պատասխանում է.

— Դու էլ մի քիչ ինձնից խմիր, հովացիր։

11.ԼԵՌՆԵՐ

Հայոց լեռները հաղթանդամ ու հսկա եղբայրներ են եղել։ Ամեն առավոտ վաղ արթնանալիս՝ նրանք սովորություն են ունեցել նախ կապել իրենց գոտիները, հետո միայն բարևել իրար։ Բայց երբ եղբայրները ծերանում են, էլ չեն կարողանում վաղ վեր կենալ։ Մի օր էլ, ուշ արթնանալով, նրանք մոռանում են կապել գոտիները և, հակառակ սովորության, իրար բարևում են առանց գոտիները կապելու։
Աստված տեսնելով այդ, պատժում է եղբայրներին, նրանք քարանում են, դառնում են լեռներ, գոտիները՝ կանաչ դաշտեր, իսկ արցունքները՝ անմահական աղբյուրներ։

qqq